„Gagnrýni ekki bönnuð í Pentagon"

„Robert Gates, varnarmálaráðherra Bandaríkjanna, segir afsögn æðsta yfirmanns herafla Bandaríkjanna í Miðausturlöndum í gær, ekki vera merki yfirvofandi stefnubreytingar bandarískra stjórnvalda í Íran, Írak og Afganistan. Þetta kemur fram á fréttavef BBC.

Þá segir Geoff Morrell, yfirmaður upplýsingadeildar bandaríska varnarmálaráðuneytisins Pentagon, ekki rétt að líta á afsögn hans sem vísbendingu um gagnrýn umræða sé ekki að skapi ráðuneytisins.   

Gates tilkynnti um afsögn Williams Fallons aðmíráls í gær og í kjölfarið sagði Fallon ástæðu afsagnar sinnar vera þá upplifun almennings að um djúpstæðan ágreining sé að ræða á milli hans og George W. Bush Bandaríkjaforseta.

Sagði hann það skapa erfitt og vandræðalegt andrúmsloft að almenningur skuli hafa það á tilfinningunni að skoðanir hans stangist á við skoðanir stjórnarinnar.

Sjálfur fór Fallon ekki nánar út í það hversu mikill hinn raunverulegi ágreiningur væri en Gates sagðist ekki telja slíkan ágreining hafa verið til staðar í raun.

Mikið hefur verið rætt um andstöðu Fallons við hugsanlegar hernaðaraðgerðir Bandaríkjanna gegn Íran og í aprílhefti Esquire tímaritsins er hann kallaður „sterkasti maðurinn sem standi á milli Bandaríkjastjórnar og stríðs við Íran.”

• 1 blogg um fréttina

Bloggað um fréttina

• Guðjón Sigþór Jensson: Fyrirsögn Morgunblaðsins í dag