52 stúlkur fluttar af búgarði sértrúarsöfnuðar í Texas

Yfirvöld í Texas fluttu í gær 52 stúlkur af búgarði sértrúarsöfnuðar vegna gruns um kynferðislega misnotkun. Leiðtogi söfnuðarins, Warren Jeffs, var hnepptur í fangelsi í fyrra eftir að hann var fundinn sekur um að hafa neytt 14 ára stúlku í söfnuðinum til að giftast frænda hennar.

Stúlkurnar sem fluttar voru af búgarðinum eru frá sex mánaða til 17 ára. Sumar eru í umsjá yfirvalda, en aðrar fara á fósturheimili.

Jeffs bíður nú réttarhalda í Arizona, þar sem hann er ákærður fyrir aðild að fjórum sifjaspellsmálum og kynferðislegri misnotkun á barni í tengslum við skipulögð hjónabönd. 

Talið er að um 150 manns búi á búgarði söfnuðarins skammt frá Eldorado í Texas. Alls eru um 10.000 manns í söfnuðinum, búsettir í Arizona og Utah, auk Texas.

Söfnuðurinn klofnaði frá Mormónakirkjunni fyrir rúmri öld. Meginkenningarnar sem söfnuðurinn fylgir hljóða upp á að karlar verði að taka sér að minnsta kosti þrjár konur til að komast til himna, og að konur eigi að vera eiginmönnum sínum undirgefnar.

• 5 blogg um fréttina

Bloggað um fréttina

• Guðríður Hrefna Haraldsdóttir: Söfnuður hinna tíu þúsund engla
• Sævar Örn Eiríksson: Í guðs nafni
• hofy sig: Hjáguðadýrkendur.
• Guðrún Fanney Einarsdóttir: afsökun fyrir perraskap!!
• Stefán Friðrik Stefánsson: Kynferðisleg drottnun og fjölkvæni í Texas