Ki-moon hvetur til herferðar gegn malaríu

Ban Ki-moon, framkvæmdastjóri Sameinuðu þjóðanna hefur hafið herferð gegn malaríu í tilefni af því að fyrsti alþjóðlegi malaríudagurinn er í dag.

Milljónir manna deyja af völdum sjúkdómsins á ári hverju, og eiga 90% dauðsfalla sér stað í Afríku.  Í yfirlýsingu frá Ki-moon kallar hann eftir því að fyrir árið 2010 hafi allir Afríkubúar aðgang að grundvallaraðbúnaði til þess að koma í veg fyrir sjúkdóminn.  Þá vill Ban að allir sem eru í hættu, sérstaklega konur og börn, hafi betri aðgang að moskítónetum og skordýraeitri.

Fram kemur á fréttavef BBC að hálfur milljarður manna smitist af malaríu á ári hverju og að barn deyi af völdum sjúkdómsins á 30 sekúndna fresti.  Þrátt fyrir það sé hægt að koma í veg fyrir sjúkdóminn og lækna hann.

Þá kemur fram í frétt BBC að tilraunir til þess að hafa hemil á sjúkdómnum hafi ekki borið nógu góðan árangur og að dauðsföll vegna malaríu hafi aukist.

Barn frá Sambíu situr undir moskítóneti. Reuters

• 1 blogg um fréttina

Bloggað um fréttina

• Snorri Bergz: Malaría