Palestínumenn samþykkja vopnahlé

Tólf fylkingar Palestínumanna hafa samþykkt tillögur Egypta um vopnahlé við Ísraela, og gert er ráð fyrir að það taki gildi fyrst á Gasa svæðinu og síðar á Vesturbakkanum.  Egypska ríkisfréttastofan Mena greindi frá þessu í dag. 

Tillögurnar voru samþykktar eftir löng fundahöld samningamanna í Kaíró, höfuðborg Egyptalands.  Mena fréttastofan hefur eftir ónefndum egypskum embættismanni að í tillögunni væri gert ráð fyrir „yfirgripsmiklu og gagnkvæmu vopnahléi sem tæki gildi samtímis."  Embættismaðurinn sagði að vopnahléið myndi fyrst taka gildi á Gasa og síðar á Vesturbakkanum.

Egypskir samningamenn hafa unnið að samkomulagi sem felur í sér sex mánaða vopnahlé á milli Ísraela og palestínsku fylkinganna á Gasa, fangaskiptum, og opnun landamæra Gasa svæðisins.

Á fréttavef BBC kemur fram að fulltrúar Hamas og Fatah, aðal hreyfinga Palestínumanna, sem eru í andstöðu, hafi ekki verið viðstaddir samningafundi í Kaíró.   Ísraelar hafa þegar hafnað tillögum Hamas um vopnahlé, og sögðu í síðustu viku að tilboð Hamas liða væri bragð þeirra til þess að fá meiri tíma til þess að undirbúa frekari bardaga.

• 1 blogg um fréttina

Bloggað um fréttina

• Vésteinn Valgarðsson: Nú sýna Ísraelar friðarvilja sinn í verki