Útlit fyrir sigur Íhaldsflokks í Lundúnum

Allt útlit er fyrir, að Boris Johnson, frambjóðandi Íhaldsflokksins, verði næsti borgarstjóri í Lundúnum en verið er að telja atkvæði sem greidd voru í borgarstjórakosningum í gær. Johnson er yfir í átta af þrettán kjördæmum í borginni en Ken Livingstone, borgarstjóri og frambjóðandi Verkamannaflokksins, er yfir í fimm.

 Almennt var búist við að Verkamannaflokkurinn myndi tapa fylgi í sveitarstjórnakosningunum í gær en úrslitin eru mun verri en spáð var. Hefur flokkurinn tapað nærri 400 sætum í bæjar og sveitarstjórnum á Englandi og í Wales en Íhaldsflokkurinn hefur bætt við sig 267 sætum.

Adam Boulton, stjórnmálaskýrandi Sky fréttastofunnar, sagði að þetta væri afar alvarleg niðurstaða fyrir Verkamannaflokkinn.

David Cameron, leiðtogi Íhaldsflokksins, sagði að niðurstaðan væri traustsyfirlýsing við flokkinn. Gordon Brown, forsætisráðherra og leiðtogi Verkamannaflokksins, sagði, að úrslitin væru vonbrigði en  flokkurinn hefði hlustað á kjósendur og myndi læra af þessari reynslu. 

• 4 blogg um fréttina

Bloggað um fréttina

• Guðmundur Jónas Kristjánsson: Breski sósíaldemókratisminn á undanhaldi
• Ómar Ragnarsson: Einni tröppu of hátt eins og Erhard.
• Björgvin Guðmundsson: Breski Verkamannaflokkurinn tapaði miklu í sveitarstjórnarkosningunum
• Stefán Friðrik Stefánsson: Rauða Ken sparkað - Boris á sigurbraut í London