Erlent | mbl | 9.5.2008 | 13:58

Hlutleysi líbanska hersins lykilatriði

Fjölskylda súnníta yfirgefur heimili sitt í hverfi Beirut sem Hizbollah samtökin hafa náð á sitt vald. AP

Að minnsta kosti ellefu hafa látið lífið í átökum Hizbollah samtakanna og herskáa súnníta í Beirút, höfuðborg Líbanons á undanförnum þremur dögum en liðsmenn Hizbollah náðu vesturhluta borgarinnar á sitt vald í morgun.

Öryggisráð Sameinuðu þjóðanna hefur hvatt báða aðila til að leggja niður vopn til að forða því að borgarastyrjöld brjótist út í landinu að nýju en borgarastyrjöld geisaði í landinu á árunum 1975 til 1990 og varð það til þess að bæði Ísraelar og Sýrlendingar gripu til hernaðaríhlutunar í landinu.

Bæði Bashar al-Assad Sýrlandsforseti og Simon Peres forseti Ísraels, lýstu því hins vegar yfir í morgun að átökin væru innanríkismál Líbana.