Erlent | mbl | 28.5.2008 | 20:37 | Uppfært 21:14

Rice á leið til Íslands

Bandarískir hermenn skammt frá Kerbala í Írak. Reuters

Utanríkisráðherra Bandaríkjanna, Condoleezza Rice hvatti í dag þjóðir heims til að flýta fyrir aðstoð og þróunarhjálp til Íraks og nota tækifærið nú er öryggismálin í Írak eru að hennar sögn að komast í jafnvægi.

Hún sagði að það væri þörf fyrir aðstoð á sviði landbúnaðar og ræktunar og uppbyggingu húsnæðis í landinu.

Rice lét þessi orð falla á alþjóðlegri ráðstefnu um málefni Íraks í Stokkhólmi og sagði að nú væri ekki lengur hægt að nota óstöðugleika sem afsökun fyrir að standa ekki við gefin loforð um þróunaraðstoð.

Rice á leið til Íslands

Rice sem mun halda til Íslands á föstudaginn kemur og ræða hér við Geir H. Haarde forsætisráðherra og Ingibjörgu Sólrúnu Gísladóttur utanríkisráðherra á meðan dvöl hennar stendur.

Í Stokkhólmi deildi hún einnig á stefnu Írans í kjarnorkumálum og sagði að Íran þyrfti að svara fyrir dökka skýrslu alþjóða kjarnorkumálastofnunarinnar þar sem kemur fram að Íran hafi ekki sýnt samstarfsvilja við gerð skýrslunnar.

Rice sagðist hafa verulegar áhyggjur af því að Íran væri að fela upplýsingar fyrir kjarnorkumálastofnuninni og að Íran væri að ögra Sameinuðu Þjóðunum sem krefðust þess að fá upplýsingar um starfsemi Írans á sviði auðgunar úrans.