Erlent | mbl | 30.5.2008 | 6:43 | Uppfært 10:51

Myndir nást af óþekktum ættbálki í Brasilíu

Ljósmyndir af áður óþekktum ættbálki innfæddra í Amazon skóginum í Brasilíu hafa náðst úr lofti. Á myndunum sjást innfæddir rauðmálaðir með boga og örvar, sem þeir beina upp í loft í átt að flugvélinni. Einnig sjást heimkynni innfæddra, kofa með stráþaki, umkringdan þéttum skógi.

Brasilísk stjórnvöld segjast hafa náð myndunum til þess að sýna fram á að ættbálkurinn er til og til þess að vernda land þeirra. Að sögn stjórnvalda efast margir um að áður óþekktir ættbálkar finnist lengur í Amazon skóginum, og því sé mikilvægt að sýna heiminum tilvist þeirra, til þess að koma í veg fyrir að þessir ættbálkar deyi út.

Talið er að um 100 óþekktir ættbálkar séu til í heiminum og að helmingur þeirra eigi heimkynni í Amazon skóginum á landamærum Perú og Brasilíu. Myndirnar náðust á nokkrum ferðalögum yfir Acre svæðið í Brasilíu, að því er fram kemur á fréttavef BBC.