Tsvangirai hættur

Forsetaframbjóðandi stjórnarandstöðunnar í Simbabve, Morgan Tsvangirai, tilkynnti á blaðamannafundi í dag í höfuðborg landsins, Harare, að hann væri hættur við framboðið. Sagði Tsvangirai að hann hefði ákveðið að hætta við framboðið vegna ofbeldisöldunnar í landinu og að ekki væri möguleiki á að kosningarnar yrðu trúverðugar.

„Við getum ekki beðið fólk um að kjósa þann 27. júní ef atkvæðið kostar það lífið. Við munum ekki lengur taka þátt í þessu ofbeldi sem hefur fylgt kosningunum," sagði  Tsvangirai. „Mugabe hefur boðað til stríðs og við viljum ekki taka þátt í því stríði," bætti hann við.

Tsvangirai fékk flest atkvæði í fyrri umferð forsetakosninganna sem fram fóru í Simbabve þann 29. mars sl. en fékk ekki hreinan meirihluta og átti því að kjósa á milli hans og  Roberts Mugabe, sem hefur verið forseti Simbabve frá því landið fékk sjálfstæði frá Bretum. Mugabe er 84 ára gamall. 

Morgan Tsvangirai HOWARD BURDITT

• 4 blogg um fréttina

Bloggað um fréttina

• Snorri Bergz: Ofbeldið sigrar
• Vésteinn Valgarðsson: "Mugabe er 84 ára gamall."
• Fjarki : Það er ennþá gott að búa á Íslandi.
• Arngrímur Stefánsson: Jæja, þá er þessu lokið í bili.