Erlent | mbl | 17.7.2008 | 12:52

Reyndi að opna flugvélahurð í lofti

Flugvél með 250 farþega um borð á leið frá Bretlandi til Kúbu, var lent á Bermúda vegna drukkins farþega sem lét illa. Reuters

Flugmaður farþegavélar á leið frá London til Kúbu neyddist til þess að lenda vélinni á Bermúda í gær til þess losna við einn af farþegum vélarinnar. Breskur maður, sem var um borð ásamt konu sinni og þrem börnum, var drukkinn og hegðaði sér illa í vélinni með ýmsum svívirðingum við farþega og flugþjóna. Gerði hann m.a tilraun til þess að opna hurðina á vélinni, þegar áhöfnin reyndi að róa hann niður, að því er fram kemur á breska fréttavefnum Dailymail.

Lögregla á Hamilton flugvelli á Bermúdaeyjum kom inn í vélina og fjarlægði manninn. Um 250 farþegar voru í vélinni, þar af 30 börn. Talsmaður First Choice leiguflugfélagsins segir að farþegum vélarinnar og áhöfn hafi verið komið fyrir á hóteli á Bermúda þar sem þau gistu í eina nótt vegna atviksins. Löglega séð eigi áhöfnin rétt á hvíldartíma, og varaáhöfn félagsins sé ekki til taks á Bermúda. Því megi farþegar búast við allt að 14 tíma seinkun.

Á fréttavef Dailymail kemur fram að reiði meðal flugfarþega hafi aukist um 62% á síðastliðnum 12 mánuðum, og fjórfaldast á undanförnum fimm árum. Í maí var flugi með breskum ferðamönnum á leið frá Egyptalandi til Bretlands, snúið til Frakklands eftir að kona beit kærasta sinn í andlitið. Tveir óeinkennisklæddir lögreglumenn sem voru um borð vélarinnar þurftu að halda parinu, sem var drukkið, niðri þar til vélinni var lent.