Sviss fær ekki olíu frá Líbýu

Olíuútflutningsfyrirtæki í Líbýu sagðist í morgun hafa hætt að senda olíu til Sviss til að mótmæla því að Hannibal, yngsti sonur Moammars Gaddafis, leiðtoga Líbýu, var handtekinn nýlega í Genf ásamt eiginkonu sinni. Svisslendingar fá stærstan hluta þeirrar hráolíu, sem þeir nota, frá Líbýu.

Útflutningsfyrirtækið er í eigu líbýska ríkisins. Ali Bilhajj Ahmed, forstjóri fyrirtækisins segir að þessar aðgerðir séu það minnsta, sem hægt er að gera. Hann sagði, að viðskiptin við Sviss væru um 40% allra viðskipta fyrirtækisins.

Hannibal, sem er 32 ára, og eiginkona hans voru í haldi lögreglu í Genf í tvo sólarhringa um miðjan mánuðinn en kærur bárust á hendur þeim um að þau hefðu misþyrmt tveimur úr starfsliði þeirra þar sem þau dvöldu á lúxushóteli í borginni. Kona Hannibals er komin langt á leið. Þau hjón eiga yfir höfði sér ákæru fyrir líkamsárás og hótanir. Þau neita sök.

Utanríkisráðuneyti Sviss sendi í gær stjórnvöldum í Líbýu formleg mótmæli vegna refsiaðgerða, sem Líbýustjórn virðist hafa gripið til vegna málsins. Í yfirlýsingu frá ráðuneytinu kom fram að svissnesku fyrirtækjunum ABB og Neslé hafi verið skipað að loka skrifstofum sínum í Líbýu og svissneskt starfsfólk þar í landi hafi verið handtekið. Þá hafi Líbýumenn fækkað áætlunarflugum milli landanna, hætt að veita svissneskum ríkisborgurum vegabréfsáritanir til landsins og kallað sendiráðsstarfsmenn heim frá Sviss.

• 1 blogg um fréttina

Bloggað um fréttina

• Snorri Bergz: Móðgum Afghani og það strax!