Rússar halda í átt að Tbilisi

Skriðdrekar og herbílar Rússa fóru í dag frá georgísku borginni Gori, sem er skammt frá Suður-Ossetíu, og stefndu inn í Georgíu í átt að höfuðborginni Tbilisi. Forseti Georgíu sagði í viðtali við sjónvarpsstöðina CNN, að Rússar væru að reyna að umkringja höfuðborgina.

AP fréttastofan segir, að þetta sé brot á vopnahléssamkomulagi, sem Rússar og Georgíumenn féllust á í gærkvöldi eftir milligöngu Frakka.

AP segir, að  nokkrir tugir rússneskra herbíla stefni nú út úr Gori í suðurátt, lengra inn í Georgíu.

Samkvæmt vopnahléssamkomulaginu eiga Rússar að flytja her sinn til þeirra staða þar sem hann var áður en átökin í Suður-Ossetíu brutust út í síðustu viku.

AP fréttastofan segir einnig, að nokkrir tugir stríðsmanna frá Abkhasíu hafi farið inn í Georgíu í dag og sett  fána héraðsins á brú yfir Inguriá. Sögðust þeir vera að helga sér land, sem tilheyrði Abkhasíu af sögulegum ástæðum og að hersveitir Georgíu hefðu yfirgefið svæðið. 

• 2 blogg um fréttina

Bloggað um fréttina

• Ómar Ragnarsson: Slæmt, ef rétt er.
• Snorri Bergz: Rússar að hernema Georgíu?