Rússar ætla að slíta hermálatengsl við NATO

Norsk stjórnvöld segja, að Rússar hafi tilkynnt þeim að þeir ætli að slíta öll hermálatengsl sín við NATO. Hefur AP fréttastofan eftir talsmanni norska varnarmálaráðuneytisins, að sendiráð landsins í Moskvu hafi fengið símtal frá rússneska varnarmálaráðuneytinu þar sem tilkynnt var að Rússar ætluðu að frysta alla hermálasamvinnu við NATO og lönd sem tengjast bandalaginu. 

Fram kom í símtalinu, að bréfleg staðfesting á þessu myndi berast bráðlega.

AP náði ekki tali af rússneskum embættismönnum vegna þessa og embættismenn í höfuðstöðvum NATO sögðust ekki hafa fengið neinar slíkar tilkynningar. 

Utanríkisráðherrar NATO gagnrýndu Rússa harðlega á fundi sínum í gær. Í ályktun fundarins voru Rússar m.a. átaldir fyrir að beita óhóflegu vopnavaldi. Þá var ákveðið að fresta fundum NATO-Rússlandsráðsins þar til Rússar uppfylltu ákvæði friðarsamkomulags, sem forsetar Rússlands og Georgíu skrifuðu undir. 

• 1 blogg um fréttina

Bloggað um fréttina

• Snorri Bergz: Mikið áfall fyrir Ingibjörgu Sólrúnu og Varnarmálastofnunina