Í stríð við borgarmáva

Skosk stjórnvöld hafa lýst yfir stríði gegn sífellt árásargjarnari borgarmávum. Fyrsta orrustan verður háð í vor í bænum Dumfries þegar sérstakur „átakshópur“ mun eyða hreiðrum mávanna og hrekja þá á brott.

„Mávar eru plága í bæjum og borgum í Skotlandi,“ sagði Michael Russell, umhverfisráðherra í skosku heimastjórninni. „Þeir þrífast á úrgangi og árásargirni þeirra gagnvart öðrum fuglum, gæludýrum og jafnvel fólki færist í vöxt.“

Russell sagði að í Dumfries væru mávarnir einstaklega mikil plága, og gerðu reglulega „steypiárásir“ á fólk. Hefði hann meira að segja heyrt dæmi um það frá Dumfries að blaðburðardrengur hafi orðið að hætta útburði vegna ítrekaðra árása máva.

Formaður bæjarráðs í Dumfries sagði að nóg væri komið af umræðum um málið og tími til að láta til skarar skríða áður en mávarnar yllu einhverjum miklum skaða.

• 2 blogg um fréttina

Bloggað um fréttina

• Dofri Hermannsson: Hringið í Mr Baldursson í Edinborg!
• Emil Örn Kristjánsson: Verðugt verkefni