Cindy McCain tekur ekki undir skoðanir Palins

Cindy McCain, eiginkona forsetaframbjóðanda Repúblikanaflokksins, John McCain, er ekki sammála varaforsetaefni flokksins, Sarah Palin í ýmsum málum. Til að mynda telur Cindy eðlilegt að konur sem verða barnshafandi eftir nauðgun eða sifjaspell fái að fara í fóstureyðingu ef þær óska þess ólíkt Palin.

Cindy McCain er einnig á því að eðlilegt sé að stjórnvöld komi að fjármögnun kynfræðslu en Palin hefur ekki stutt það að Alaska, þar sem hún er ríkisstjóri, fjármagni kynfræðslu ungmenna.

Palin er alfarið á móti fóstureyðingum og hafnar því að heimila undantekningar á þeirri reglu ef þungun er tilkomin vegna nauðgunar eða sifjaspella.

Cindy McCain sagði í þættinum Good Morning America á ABC sjónvarpsstöðinni í morgun að hún væri ekki sammála Palin en hún virti skoðanir hennar.

Cindy McCain sagðist jafnframt vera því fylgjandi að kynfræðsla verði hluti af námsefni skólabarna.

• 2 blogg um fréttina

Bloggað um fréttina

• Kristín Björg Þorsteinsdóttir: Sara Palin
• Magnús Helgi Björgvinsson: Jónas Kristjáns um Sarah Palin