Ástralskir stjórnarandstöðuþingmenn hvetja nú stjórn landsins til að standa uppi í hárinu á Japönum vegna meintra atkvæðakaupa þeirra í Alþjóðahvalveiðiráðinu.

Þrjár Afríkuþjóðir: Erítrea, Tansanía og Lýðveldið Kongó hafa nýlega gengið í ráðið en fulltrúar allra þessara þjóða áttu viðræður við japanska utanríkisráðuneytið í Tókýó í mars. Samkvæmt yfirlýsingu japanskra stjórnvalda var viðræðunum ætlað að auka skilning ríkjanna á sjálfbærum hvalveiðum Japana.

Ástralska dagblaðið The Age hefur eftir Greg Hunt, sem fer með umhverfismál í skuggaráðuneyti stjórnarandstöðunnar, að Kevin Rudd, forsætisráðherra, eigi að taka atkvæðakaupamálið þegar upp við japönsk stjórnvöld. Svo virðist hins vegar, sem áhyggjur Rudds af hvalveiðum hafi gufað upp um leið og hann tók við embætti forsætisráðherra í lok síðasta árs.

Talsmaður ástralska umhverfisráðuneytisins segir við blaðið, að Ástralía fagni tækifærinu að hitta ný aðildarríki hvalveiðiráðsins og ræða síðustu þróun í vísindarannsóknum á sjávarspendýrum. 

Erítrea er við Rauðahaf. Það er nú í 157. sæti af 177 á lista Sameinuðu þjóðanna þar sem löndum er raðað eftir lífsgæðum. The Age hefur eftir talsmanni Grænfriðinga, að ekkert sé vitað um afstöðu stjórnvalda í Erítreu til hvalveiða eða ástæður þess, að fátækt landbúnaðarríki vilji ganga í Alþjóðahvalveiðiráðið. 

Japanar hafa oft áður verið sakaðir um að fá smáríki til að ganga í hvalveiðiráðið og greiða þar atkvæði með hvalveiðiríkjum gegn ýmiskonar  þróunaraðstoð.

Tengdar fréttir

Hvalveiðar

Mál Black Cube ekki á borði ríkissaksóknara

• Fjögur fyrirtæki sótt um leyfi til hvalveiða
• Fátt um svör vegna Black Cube
• „Er í mínum huga engin frétt“
• Ríkislögreglustjóri kannar málsatvik

» Fleiri tengdar fréttir

• 1 blogg um fréttina

Bloggað um fréttina

• Jónas Egilsson: Athyglisverð ásökun