Saka Bandaríkin um hryðjuverk

Utanríkisráðherra Sýrlands sakar Bandaríkjastjórn um að hafa framið hryðjuverk og glæp þegar bandarískar herþyrlur gerðu loftárás á skotmörk í Sýrlandi.

Fram kemur á fréttavef breska ríkisútvarpsins að Walid Muallem segi að í gær hafi fjórar þyrlur flogið um 13 km inn fyrir sýrlenska lofthelgi. Hann segir að þyrlurnar hafi allar tekið á loft í Írak. Muallem segir að átta óvopnaðir saklausir borgarar hafi fallið í árásinni, þar á meðal þrjú börn.

Bandaríkin hafa hvorki játað því né neitað að hafa staðið á bak við þessa árás.

Hins vegar á ónefndur bandarískur embættismaður að hafa sagt í samtali við AFP-fréttastofuna að Bandaríkjaher hafi staðið á bak við loftárásir á erlenda bardagamenn sem hafi ógnað bandarískum hermönnum í Írak. Sú aðgerð hafi heppnast vel.

Bandaríkjastjórn hefur sakað stjórnvöld í Sýrlandi um að hleypa uppreisnarmönnum yfir landamærin til Íraks. Muallem heldur því hins vegar fram að sýrlensk stjórnvöld reyni eftir fremsta megni að herða eftirlit við landamæri Sýrlands og Íraks.

• 1 blogg um fréttina

Bloggað um fréttina

• Guðmundur Ásgeirsson: Hækka hitann!