Yfirmaður flughers Japana rekinn

Varnarmálaráðherra Japans rak í dag yfirmann flughers landsins vegna ummæla hans um að flugher Japans hefði ekki stundað árásir í síðari heimsstyrjöldinni.

Viðhorf Toshio Tamogami, yfirmanns flughers Japans, sem birt voru á netinu, hafa vakið hörð viðbrögð meðal nágranna Japana. Tamogami sagði meðal annars að það væri beinlínis rangt að Japan hefði í síðari heimsstyrjöldinni verið árásargjörn þjóð. Franklin D. Roosevelt, þáverandi bandaríkjaforseti hefði hreinlega neytt Japan til þátttöku í stríðinu.

Óvænt árás flughers Japans á Pearl Harbor flotastöðina í Hawaii í desember 1941 verður lengi í minnum höfð en hún var vendipunktur í þátttöku bandaríkjahers í síðari heimsstyrjöldinni. Fram að þeim tíma höfðu Bandaríkin veitt Bretum stuðning í formi tækja og tóla en reynt að öðru leyti að viðhalda hlutleysisstefnu.

Bæði varnarmálaráðherra og forsætisráðherra Japan sögðu í dag að ummæli yfirmanns flughersins væru óviðeigandi og gengju þvert á stefnu landsins.

Japönsk stjórnvöld lýstu árið 1995 yfir iðrun vegna framgögngu þjóðarinnar í síðari heimsstyrjöldinni og ítrekuðu þá yfirlýsingu áratug síðar.

Í lok ósigurs í síðari heimsstyrjöldinni, afsalaði Japan sér réttinum til að heyja stríð og kalla þeir flugher sinn því varnarlið. Engu að síður fylgjast nágrannaþjóðir grannt með öllum hernaðartilburðum Japana.

• 1 blogg um fréttina

Bloggað um fréttina

• Ólafur Ragnarsson: Brottrekstur