Stofnfrumur aftur í umræðuna

Líkur eru taldar á að Barack Obama, nýkjörinn forseti Bandaríkjanna, muni endurskoða afstöðu forvera síns, George W. Bush forseta, til stofnfrumurannsókna. Samtök kaþólskra biskupa í Bandaríkjunum vara frambjóðandann við þeim þjóðfélagslega klofningi sem slík endurskoðun geti leitt af sér.

Telja samtökin að málið geti klofið milljónir Bandaríkjamanna í tvær andstæðar fylkingar, á sama tíma og andstæðingar fóstureyðinga búa sig undir harða baráttu gegn tilraunum með stofnfrumur á nýju ári.

Meirihluti lækna tekur annan pól í hæðina og horfir nú til þeirra möguleika sem kunni að felast í rannsóknunum, sem taldar eru munu geta leitt til meðferðarúrræða sem bjargi mannslífum.

Hvort Obama snýr við banni við opinberri fjármögnun á þessu rannsóknasviði, sem sett var í stjórnartíð Bush forseta, kemur í ljós eftir að hann sver embættiseið þann 20. janúar næstkomandi. 

„Spurningin er hvort frumskógarlögmálið taki við af stefnu Bush,“ sagði Richard Doerflinger, baráttumaður gegn fóstureyðingum innan raða samtaka kaþólskra biskupa, í viðtali við dagblaðið Usa Today, og átti þá við þann möguleika að með afnámi bannsins muni vísindamenn skapa, klóna og eyða mannfóstrum á víxl við rannsóknir sínar.

„Við höfum miklar áhyggjur af þessu siðferðislega máli,“ sagði Doerflinger áhyggjufullur.

Leikarinn Michael J. Fox hefur komið opinberlega fram og stutt þá frambjóðendur demókrata sem berjast fyrir stofnfrumurannsóknum. AP

• 1 blogg um fréttina

Bloggað um fréttina

• Óli Jón: Rannsóknir á stofnfrumum