Erlent | AP | 3.12.2008 | 13:47

Danaprins heimsótti danska hermenn í Afganistan

Friðrik og Gade í hópi danskra hermanna í Afganistan. AP

Friðrik krónprins Dana og Søren Gade, varnarmálaráðherra, heimsóttu í gær danska hermenn í Afganistan og dvöldu í herbúðum Dana í nótt. Ekki var skýrt frá heimsókninni fyrr en í dag þegar Friðrik og Gade voru farnir frá landinu.

Í tilkynningu frá danska varnarmálaráðuneytinu kemur fram að tvímenningarnir fóru til Armadrillo herbúðanna í suðvesturhluta Helmandhéraðs á mánudag. Þeir sváfu í svefnpokum í búðunum og snæddu í mötuneytinu með hermönnunum.

Þá heimsóttu Friðrik og Gade tvær aðrar danskar herbúðir og áttu viðræður við Abdul Ahad Khan, héraðsstjóra, og fleiri embættismenn á svæðinu.

Ráðuneytið segir, að Friðrik og Gade hafi viljað kynna sér aðbúnað hermannanna og þakka þeim fyrir framlag þeirra við að koma á stöðugleika í Afganistan.

Um 700 danskir hermenn eru nú í Afganistan, flestir í Helmandhéraði undir stjórn Breta. 16 Danir hafa látið lífið í landinu frá því Danir sendu fyrst hermenn þangað undir merkjum NATO árið 2001.