Ísraelskur hermaður fallinn

Heryfirvöld í Ísrael staðfestu í dag að einn ísraelskur hermaður hefði fallið í átökum við Hamas liða á Gaza svæðinu í morgun. Um 30 hermenn hafa særst frá því að ísraelski herinn gerði innrás á svæðið síðla dags í gær, þar af tveir alvarlega. Að minnsta kosti 40 Palestínumenn hafa látið lífið síðan innrásin hófst í gær og er tala látinna Palestínumanna nú nær 500 frá því að Ísraelar hófu árásir á Gaza þann 27. desember síðastliðinn.

Víða um heim mótmæltu þúsundir manna í dag árásum Ísraela á Palestínumenn. Meðal annars mótmæltu tugir þúsunda í Ankara og Istanbul í Tyrklandi. Strax í morgun hafði mannfjöldi safnast saman fyrir utan sendiskrifstofur Ísraels og Sameinuðu þjóðanna í þessum borgum.

Einnig var efnt til mótmæla í Pakistan, Kína, Malasíu, Singapore og Indónesíu og víðar í löndum múslíma.

Víða á Vesturlöndum var efnt til mótmæla í dag. Í London efndu friðarsamtökin Stop the War til neyðargöngu í dag. Í New York var í gær efnt til mótmæla gegn stríðinu sem og í mörgum evrópskum höfuðborgum.