Nýtt stríð Hamas og Fatah í uppsiglingu?

Liðsmenn Fatah hreyfingar Palestínumanna staðhæfa að liðsmenn Hamas samtakanna hafi drepið tíu liðsmenn Fatah á Gasasvæðinu frá því hernaðaraðgerðir Ísraela þar hófust. Þá segja þeir hundruð manna vera sára eftir árásir Hamas-liða sem m.a. hafi skotið menn vísvitandi í fæturna. Þetta kemur fram á fréttavef Ha’aretz.

„Þegar stríðið hófst, sórum við að sjá tilhneigingu til þess innan Hamas að ráðast á liðsmenn okkar,” segir liðsmaður Fatah.

„Þeir óttuðust að við myndum nýta okkur stríðið og voru stöðugt að tala um hættu sem kæmi innan frá. Það mátti heyra þá segja að þeir stæðu í baráttu á tveimur vígstöðvum, gegn Ísraelum og gegn Fatah. Þeir ýttu stöðugt undir spennuna og sögðu að þúsundir liðsmanna Fatah hefðu í hyggju að koma frá Egyptalandi og berjast gegn þeim, sem er alrangt.”

Maðurinn segir öryggislögreglu Hamas á Gasasvæðinu einnig hafa sett fjölda stuðningsmanna Fatah í stofufangelsi.  „Þeir fóru hús úr húsi og sögðu hundruð manna að fara ekki út og ef að þeir gerðu það yrðu þeir skotnir.”  

„Þeir segja að við séum hin raunverulega hætta, ekki gyðingarnir, af því að gyðingarnir komi og fari en við séum hér,” segir hann.