Hugo Chávez illa við Lech Walesa

Hugo Chávez, forseti Venesúela, íhugar nú að banna Lech Walesa, fyrrverandi forseta Póllands og lýðræðishetju, að heimsækja Venesúela. Þetta tilkynnti hann ríkisstjórn sinni í gær.

Til stóð að Walesa myndi heimsækja landið í vikunni, en á sunnudag á að kjósa um það hvort stjórnarskránni verði breytt svo að Chávez geti sóst eftir endurkjöri um óákveðinn tíma.

Walesa á að koma til landsins á föstudag samkvæmt áætlunum, og ætlar að funda þar með stúdentum og félagasamtökum, segir í viðtali við hann í blaðinu El Nacional.

Walesa, sem fékk friðarverðlaun nóbels árið 1983, hefur opinberlega lýst Chávez sem lýðskrumara og fullyrt að stjórnarandstaða verði að vera leyfileg í landinu. Hann reyndi að heimsækja Venesúela í nóvember, en þá fengu stjórnvöld hann ofan af því vegna ótilgreindra „öryggisástæðna“.

Okkur ber skylda til að standa vörð um reisn Venesúela. Walesa getur sagt hvað sem hann vill utan landamæra Venesúela, en ekki hér í Venesúela," sagði Chávez og hvatti utanríkisráðherra sinn, Nicolas Maduro, til þess að vera á tánum. „Hér hafa lengi verið uppi áætlanir um að neyða okkur til þess að feta slóð ofbeldis,“ sagði Chávez. „Fullyrðingar þessa veiklundaða átrúnaðargoðs eru mjög grunsamlegar.“

Walesa var forseti Póllands 1990-1995 og varð heimsfrægur sem leiðtogi Samstöðu, sem varð eitt helsta hreyfiafl gegn kommúnismanum undir lok sovéttímans.

• 1 blogg um fréttina

Bloggað um fréttina

• Ur-Hellinum: Stuttbuxnadeild X-D að störfum