Hillary boðar aukna samvinnu við Kínverja

Hillary Clinton, utanríkisráðherra Bandaríkjanna, boðaði aukna samvinnu Kínverja og Bandaríkjanna í opinberri heimsókn sinni til Kína í Peking í dag. Clinton telur samvinnuna afar mikilvæga.

Vék Clinton þar meðal annars að því að samstarf á sviði efnahagsmála og loftslagsmála væri afar brýnt en ríkin tvö losa meira en nokkur önnur af koldíoxíði út í andrúmsloftið.

Umræddir málaflokkar væru svo brýnir að þeir yfirskyggðu deilur vegna Tíbets og Taívans og stöðu mannréttindamála í Kína.

Clinton ræðir nú við Hu Jintao Kínaforseta og Wen Jiabao forsætisráðherra um leiðir til að efla samvinnu ríkjanna.

Þakkaði hún Kínastjórn það traust sem hún hefði sýnt gagnvart bandarískum skuldabréfum í fjármálafárviðrinu, yfirlýsing sem telst góður mælikvarði á mikilvægi Kína fyrir bandaríska efnahagskerfið.

Stjórnvöld ríkjanna hafa þegar hafið undirbúning framlags þeirra á fundi leiðtoga G 20-ríkjanna í Lundúnum í aprílbyrjun, auk þess sem Hu forseti mun í næsta mánuði eiga fund með Barack Obama forseta í Hvíta húsinu.

Meðal áhyggjuefna Kínverja er klásúla í viðreisnaráætlun stjórnar Obamas fyrir efnahagslífið sem kveður á um að keyptar skuli bandarískar vörur.

Er skýringin sú að Bandaríkin eru einn allra mikilvægasti útflutningsmarkaður landsins.

En Bandaríkjastjórn hyggst meðal annars fjármagna viðreisnaráætlunina með sölu skuldabréfa.

• 1 blogg um fréttina

Bloggað um fréttina

• Ólafur Als: Handsal gagnkvæmra hagsmuna