Erlent | AFP | 17.3.2009 | 7:04

Kínverjar kaupa upp Afríku í kreppunni

Flóttamenn í Darfur-héraði í Súdan. Sumir segja að fjárfestingar Kínverja í Afríku troði á mannréttindum, ekki síst í Súdan. HO

Kínverjar ætla að leggja tvo milljarða bandaríkjadollara til viðbótar í ríkisrekinn Afríku-fjárfestingasjóð sinn. Tilgangurinn er sá að grípa tækifæri sem vestrænir fjárfestar nýta sér ekki, eftir að hafa þurft frá að hverfa vegna fjárskorts. Þetta kemur fram í dagblaðinu Financial Times í dag.

Síðan hann var settur af stað árið 2006, hefur kínversk-afríski fjárfestingasjóðurinn keypt fyrir um 400 milljónir dollara í Afríku, hefur blaðið eftir sjóðsstjóranum Chi Jianxin, sem hélt ræðu í Jóhannesarborg í gær. Sagði hann að upphaflegum fjármunum sjóðsins verði þegar búið að ráðstafa fyrir lok þessa árs, tveimur árum á undan áætlun.

Hann sagði sjóðinn á mikilli ferð og að afrísk fyrirtæki þurfi meiri peninga frá sjóðnum því að aðrir fjárfestar hafi orðið feimnari. Tveggja milljarða dollara aukningin er þó aðeins annar fasinn í starfi sjóðsins, sem ætlað er að fjárfesta fyrir a.m.k. fimm milljarða dollara í Afríku áður en yfir lýkur.

Þegar sjóðurinn var stofnaður árið 2006 var markmiðið sagt það að hvetja kínversk fyrirtæki til að stunda viðskipti í Afríku. Hu Jintao, forseti Kína, sagði þá að sjóðurinn myndi styrkja tengslin milli Kína og Afríku. Hann hefur hins vegar verið gagnrýndur á Vesturlöndum fyrir að hafa slæmt áhrif á mannréttindi fólks í Afríkulöndum á borð við Súdan og Simbabve, í kaldrifjaðri viðleitni sinni til að fá aðgang að afrískri olíu og öðrum nauðsynlegum hráefnum til að viðhalda hagvexti heima í Kína.

Aðrir segja að sjóðurinn einbeiti sér að greinum sem auðveldi Afríku að þróast áfram. Til dæmis landbúnaði, raforku, vegagerð og vatnsveitukerfum.