Belgar íhuga mótmæli gegn páfa

Meirihluti belgíska þingsins samþykkti í kvöld tillögu þar sem belgíska stjórnin er hvött til þess að fordæma óásættanlega afstöðu páfa í tengslum við Afríkuferð hans og mótmæla henni opinberlega.

Benedikt XVI páfi sagði í flugi á leið til Kamerún nú í mars að ekki væri hægt að leysa alnæmisvandann með því að dreifa gúmmíverjum. Það gerði vandann einungis enn verri.

Forsætisráðherra Belgíu, Herman Van Rompuy, hafði fyrir atkvæðagreiðsluna í þinginu í kvöld gefið í skyn að hann myndi styðja tillöguna og fara eftir tilmælum hennar yrði orðið „óásættanleg“ sett í staðinn fyrir orðin „hættuleg og óábyrg“ afstaða. Sagði forsætisráðherrann skoðun sína á gagnsemi notkunar gúmmíverja vera allt aðra en skoðun páfa.

Menntamálaráðherra Frakklands, Xavier Darcos, fordæmdi á sunnudaginn ummæli páfa og sagði þau glæpsamleg. Portúgalski biskupinn Ilídio Leandro hefur lýst því yfir að það sé „siðferðisleg skylda“ alnæmissmitaðra að nota gúmmíverjur við kynlíf.

• 1 blogg um fréttina

Bloggað um fréttina

• Vésteinn Valgarðsson: Elliæri þöngulhaus