Gæti ,,endað með skelfingu"

Sjóræningjar frá Sómalíu, sem hafa bandaríska skipstjórann Richard Phillips í haldi, vara við því að verði reynt að bjarga honum geti það endað ,,með skelfingu". Fjórir menn eru með Phillips í haldi á litlum, vélarvana björgunarbáti nokkur hundruð km undan strönd landsins.

 Bandarískt herskip, USS Bainbridge, er statt rétt hjá bátnum og reyndi Phillips á föstudag að flýja á sundi en tilraunin mistókst. Hann er skipstjóri á flutningaskipinu Maersk Alabama sem ræningjarnir reyndu að ná á miðvikudag. Áhöfninni tókst þó að yfirbuga ræningjana og flýðu þeir á björgunarbátnum en höfðu Phillips með sér sem gísl.

 Ræningjarnir sögðust í morgun vona að þeim tækist að koma Phillips yfir í stærri bát. Fullyrt er að þeir krefjist tveggja milljóna dollara í lausnargjald fyrir manninn.

• 3 blogg um fréttina

Bloggað um fréttina

• Stefán Pétursson: Hvað varð um sjómílurnar ?
• Ásgrímur Hartmannsson: Þetta er náttúrlega frábært
• Jakob Falur Kristinsson: Sjóræningjar