Erlent | AFP | 9.5.2009 | 13:12

Páfinn á mokkasíum í moskunni

Benedikt XVI páfi gengur inn í moskuna í Amman í morgun ásamt Ghazi bin Muhammad bin Talal, prins Jórdaníu. Glöggt má sjá mokkasíur páfa.

Talsmenn Páfagarðs fullyrða að Benedikt XVI páfi hafi ekki ætlað sér að vanvirða íslam þegar hann gekk á skóm inn í Al-Hussein moskuna í Amman í Jórdaníu í morgun. Páfi hafi einfaldlega ekki verið beðinn um að taka af sér skóna.

„Páfi var reiðubúinn að taka af sér skóna en fylgdarlið hans leiddi hann rakleiðis á sérstakan dregil og nefndi ekki að hann ætti að taka af sér skóna,“ segir Federico Lombardi, talsmaður Vatíkansins.

Benedikt XVI páfi er nú í rúmlega viku vísitasíu í ríkjum Miðausturlanda. Hann hefur sagt ferð sína vera pílagrímaferð friðar. Þetta er fyrsta heimsókn hans á þetta svæði frá því hann tók við embætti páfa árið 2005. Næsti áfangastaður hans er Ísrael og síðan mun hann sækja Vesturbakkann heim.

Minnt er á að þegar Benedikt XVI páfi heimsótti Bláu moskuna í Istanbul í Tyrklandi árið 2006, tók hann af sér skóna. Þá er einnig rifjað upp að forveri Benedikts XVI, Jóhannes Páll páfi II, tók af sér skóna áður en hann gekk inn í moskuna í Damascus í heimsókn sinni árið 2000.

Benedikt XVI páfi ítrekaði virðingu sína fyrir íslam við upphaf vísitasíu sinnar til ríkja Miðausturlanda í gær. Páfi sagði trúfrelsi vera grundvallar mannréttindi og sagðist vonast til þess að kaþólska kirkjan geti komið að friðarviðræðum í Miðausturlöndum.