Forseti breska þingsins segir af sér

Michael Martin, forseti neðri deildar breska þingsins, lýsti því yfir í dag að hann myndi segja af sér embætti 21. júní í kjölfar fríðindahneykslisins sem valdið hefur trúnaðarbresti þings og þjóðar í Bretlandi að undanförnu.

Martin hefur sætt harðri gagnrýni þingmanna að undanförnu fyrir það hvernig hann hefur haldið á málinu. Var lögð fram vantrauststillaga á hann í gær en Martin neitaði að taka hana til umræðu.

Hann virðist síðan hafa komist að þeirri niðurstöðu í nótt að honum væri ekki lengur sætt í embætti og þegar hann boðaði yfirlýsingu eftir hádegið í dag var ljóst hvert stefndi. 

Martin sagðist í yfirlýsingunni segja af sér til að tryggja einingu á breska þinginu.

Gert er ráð fyrir að nýr þingforseti verði kjörinn 22. júní.  

Michael Martin. AP

• 1 blogg um fréttina

Bloggað um fréttina

• Stefán Friðrik Stefánsson: Svipbrigðalaus afsögn í Westminster