Netanyahu sagður hafa útilokað frið

Palestinsku Hamas samökin hafa lýst því yfir að Benjamin Netanyahu, forsætisráðherra Ísraels, hafi afjúpað kynþáttafordóma sína og lygar í ræðu sem hann hélt um utanríkimál í gærkvöldi. Þetta kemur fram á fréttavef Ha’aretz.

Hosni Mubarak Egyptalandsforseti hefur einnig sagt að með ræðunni hafi Netanyahu útilokað alla möguleika á friði í Miðausturlöndum.

Í yfirlýsingu Hamas-samtakanna segir að ræðan hafi verið verið hlaðin kynþáttafordómum og til þess ætluð að neita Palestínumönnum um eðlileg þjóðarréttindi þeirra. Í henni hafi Netanyahu lýst því yfir að hann vilji að hin gamla Palestína verði viðurkennd sem hreint gyðingaland og þar með neita Palestínumönnum um öll réttindi í landi sínu. 

„Netanyahu reyndi með orðaleik að afvegaleiða fólk og staðhæfa að hann vildi frið. Kynþáttafordómar hans koma hins vegar fram þegar hann hvetur Palestínumenn til að viðurkenna Palestínu sem land gyðinga. Þetta gefur til kynna að Netanyahu ljúgi þegar hann talar um frið. Þessi ræða ýtir undir hatur og illindi," segir í yfirlýsingunni.

Netanyahu sagði meðal annars í ræðunni að hann gæti fallist á stofnun sjálfstæðs ríkis Palestínumanna að því gefnu að það væri herlaust, Palestínumenn stjórnuðu ekki loftsvæði sínu og hefðu enga leið til þess að smygla vopnum inn í ríkið. Hann setti það einnig sem skilyrði fyrir stofnun Palestínuríkis að Ísrael yrði viðurkennt á alþjóðavettvangi sem gyðingaríki.

Mubarak sagði í dag ljóst að þeirri kröfu verði hvorki svarað af Egyptalandi né nokkru öðru ríki.

Talsmaður Mahmoud Abbas, leiðtoga Palestínumanna, hefur sagt yfirlýsingu Netanyahus ögrun við stefnu Palestínumanna, Arabaríkja og Bandaríkjanna.

Bandarísk yfirvöld hafa hins vegar lýst yfir ánægju sinni með ræðuna og sagt hana vera mikilvægt skref í rétta átt. Netanyahu hefur ekki viljað lýsa því yfir fyrr að stjórn hans gæti fallist á sjálfstæði ríkis Palestínumanna.