Minnst batamerki á evrusvæðinu

Efnahags- og framfarastofnunin (OECD) telur nú að botni efnahagskreppunnar í heiminum, verði náð fyrr en áður hefur verið talið. Stofnunin telur þó að samdráttur í hagkerfum þeirra þrjátíu iðnríkja sem aðild eiga að stofnuninni verði 4,1% á þessu ári. Þetta kemur fram á fréttavef BBC. 

Forsvarsmenn stofnunarinnar vara þó við því að líkur séu á því að batinn verði hægur og að hætta verði á bakslagi í nokkurn tíma. Stofnunin hefur nú í fyrsta skipti á tveimur árum endurskoðað fyrri spá sína, vegna batnandi aðstæðna.  

Sérfræðingar OECD segja að þrátt fyrir að hagvöxtur hafi dregist mikið saman frá því í október á síðasta ári fram í mars á þessu ári séu nú vísbendingar um að farið sé að draga úr hruninu. Þeir segja þó enn útlit fyrir að framleiðsla í heimunum minnki um 2,2% á þessu ári.  

Sérfræðingarnir segja kreppuna nú þá mestu frá lokum síðari heimsstyrjaldarinnar og að áhrifa hennar gæti sérstaklega í Bretlandi þar sem útlit sé fyrir 4,3% samdrátt á þessu ári og engan hagvöxt á næsta ári. Enn sé heldur engin skýr batamerki að sjá á evrusvæðinu, vegna mikilla verðhækkana á fasteignamarkaði þar, samdráttar í útflutningi og þeim skaða sem orðið hafi á fjármálamörkuðum.

 Samdráttur í Bandaríkjunum og Japan virðist hins vegar stefna í að verða minni en spáð hafi verið og það ráði miklu um þróunina á heimsmælikvarða. Það sama eigi við um stór hagkerfi ríkja, sem ekki eigi aðild að stofnuninni, svo sem Kína.   

Þetta geri það m.a. að verkum að stofnunin vonist nú til þess að 0,7% hagvöxtur verði í þeim hagkerfum sem best eru sett á árinu 2010. Í fyrri spá stofnunarinnar var gert ráð fyrir 0.1% hagvexti á næsta ári.  „Það lítur út fyrir að komist hafi verið hjá verstu niðurstöðu,” segir í yfirlýsingu stofnunarinnar.

„Jafnvel þótt þetta sé hægur bati þá er slík niðurstaða mikill árangur af þeirri vinnu sem lögð hefur verið í stefnumótun í efnahagsmálum.”