Bannað að hæða forsetann

Sett hafa verið lög í Pakistan sem banna Pakistönum að hæða forseta sinn í tölvupósti, á bloggsíðum eða í smáskilaboðum. Allt að fjórtán ára fangelsisvist liggur, samkvæmt nýju lögunum, við slíkum brotum. Þetta kemur fram á fréttavef Sky.Samkvæmt heimildum breska blaðsins The Daily Telegraph verður lögunum framfylgt af mikilli hörku en alríkislögreglu Pakistans er ætlað að rekja slóðir brandara um Asif Ali Zardari, forseta landsins, á netinu.

Rehman Malik, innanríkisráðherra landsins, segir lögin sett til þess að hamla illkvittnislegum áróðri gegn ríkisstjórn landsins. „Þetta skref mun heimila refsingar gegn þeim sem semja illgirnislegar og tibúnar sögur um borgaraleg yfirvöldum og senda þær í tölvupóstum eða með smáskilaboðum,” sagði hann.

 

Bloggarar og aðrir þeir sem vilja gera grín að Zardari forseta með aðstoð tækninnar hafa þegar brugðist við hinum nýju lögum með því að gefa forsetanum gælunöfn á borð við „dacu” (stigamaður) og „choor” (þjófur).

 Gagnrýnendur nýju laganna segja þau minna á stjórnartækni Musharrafs, fyrirrennara Zardaris í embætti.

Í síðasta mánuði var lagður skattur á smáskilaboð til að reyna að stemma stigu við fjöldasendinum af þessu tagi. Hann var hins vegar afnuminn að nýju þar sem hann kom strax niður á tekjum símafyrirtækja.

Málið varð hins vegar til þess að ýta enn frekar undir sendingu háðsskeyta um Zardari.