Erlent | mbl | 4.9.2009 | 19:32

Hermaður dæmdur í lífstíðarfangelsi

Steven Green var dæmdur í fimmfalt lífstíðarfangelsi fyrir glæpi sína í Írak. AP

Dómari í Kentucky í Bandaríkjunum hefur staðfest að fyrrum bandarískur hermaður, sem var sakfelldur fyrir nauðgun og morð er hann var við skyldustörf í Írak, muni sitja á bak við lás og slá ævilangt.

Steven Green, sem er 24 ára, hlaut fimm lífstíðardóma fyrir að hafa nauðgað 14 ára gamalli íraskri stúlku og myrt hana, og fjölskyldu hennar, skammt frá Bagdad árið 2006

Fram kemur á fréttavef BBC að kviðdómur í Kentucky hafi ekki getað komist að einróma niðurstöðu hvort taka ætti Green af lífi fyrir glæpi sína. Hann hefur því sloppið við dauðarefsingu.

Fjórir hermenn til viðbótar eru nú í fangelsi fyrir aðild sína að málinu. Þeir hlutu allt frá fimm til 110 ára fangelsi. Green er hins vegar sagður vera höfuðpaurinn í málinu.