Ahmadinejad útnefnir aðra konu

Mahmoud Ahmadinejad, forseti Írans, hefur aftur útnefnt konu til að gegna embætti menntamálaráðherra í landinu. Sú sem forsetinn útnefndi fyrst hlaut ekki náð fyrir íranska þinginu.

Ahmadinejad útnefndi einnig nýjan orkumálaráðherra eftir að sá fyrri fékk heldur ekki stuðning á þinginu. 

Fréttastofan Mehr segir að forsetinn hafi útnefnt Fatemeh Alia sem ráðherra menntamála og Ali Zabihi sem orkumálaráðherra nú síðdegis.

Þetta er annað kjörtímabil Alia á þinginu, en hún er sögð náinn stuðningsmaður forsetans. Zabihi er yfirmaður tryggingastofnunar Írans, sem sér aðallega um líffeyri eldri borgara í landinu.

Það mun koma í ljós 15. september nk. hvort Alia og Zabihi muni hljóta stuðnings meirihluta þingsins.

• 2 blogg um fréttina

Bloggað um fréttina

• Svanur Gísli Þorkelsson: Kona til að kúga konur
• Axel Jóhann Hallgrímsson: Íransforseti ber hausnum við steininn.