Erlent | mbl | 7.9.2009 | 22:18

Stærðin sögð skipta máli fyrir Sarkozy

Nicolas Sarkozy með Angelu Merkel, kanslara Þýskalands. Reuters

Stjórnarandstaðan í Frakklandi hæddist í dag að Nicolas Sarkozy, forseta landsins, eftir að skýrt var frá því að embættismenn hans hefðu beðið yfirmenn verksmiðju um að láta aðeins smávaxna starfsmenn standa á bak við hann þegar hann flutti þar ræðu nýlega. Franskur verkalýðsforingi fullyrti þetta en talsmaður Sarkozy neitaði fréttinni, sagði hana „fáránlega“.

Sarkozy er 1,65 metrar á hæð og enginn starfsmannanna, sem stóðu á bak við hann, var áberandi stærri en hann. Þeirra á meðal var kona sem staðfesti í viðtali við belgíska sjónvarpsstöð að hún hefði verið valin vegna þess að hún væri smærri en forsetinn. Frétt belgísku sjónvarpsstöðvarinnar hefur verið dreift á netinu og vakið mikla athygli í Frakklandi.

Hermt er að stærðin sé mjög viðkvæmt mál fyrir Sarkozy og hann hafi beitt ýmsum ráðum til að sýnast stærri, til að mynda notað skó með þykka sóla.