AGS: Meiri stuðning fyrir fátæk ríki

Framkvæmdastjóri Alþjóðagjaldeyrissjóðsins, Dominique Strauss-Kahn, hvatti til þess í dag að fátækum ríkjum yrði veittur meiri stuðningur til þess að takast á við afleiðingar alþjóðlegu efnahagskreppunnar. 

„Við verðum að tryggja að hvers konar bati í heiminum renni einnig til fátæku ríkjanna. Þessi ríki eru í sárri þörf fyrir fjárhagsstuðning til þess að gefa þeim möguleika á að takast á við kreppuna," sagði Strauss-Kahn í ræðu sem hann flutti í Washington í dag.

Hann segir að þessi ríki þurfi á um 55 milljarða dala stuðningi að halda í ár og á næsta ári. Telur Strauss-Kahn að AGS geti útvegað um þriðjung af þessari aðstoð. En fleiri verði að koma að aðstoðinni. 

Minnti hann þar á samþykkt G-8 ríkjanna frá því í Gleneagles í Skotlandi árið 2005. En þá samþykktu Bretland, Bandaríkin, Frakkland, Ítalía, Kanada, Japan, Þýskaland og Rússland að tvöfalda aðstoð sína við fátæk ríki Afríku árið 2010.

• 1 blogg um fréttina

Bloggað um fréttina

• Tómas Þráinsson: Og á þá að endurtaka leikinn sem þeir léku..