Vændiskona segir frá í sjónvarpi

Patrizia D'Addario kom fyrst fram í ítölsku sjónvarpi í gær, mörgum mánuðum eftir að hún fyrst hélt því fram að hún hefði fengið greitt fyrir að sænga með Silvio Berlusconi, forsætisráðherra Ítalíu. Saga D'Addario hefur fengið umfjöllun í blöðum en rýra í ítölsku sjónvarpi og búist var við að viðtalið yrði tekið af dagskrá á síðustu stundu.

Flestir Ítalir fá fréttir sínar úr ítölsku sjónvarpi en á þessu ári var Ítalía skilgreint sem eina vestræna lýðræðisríkið sem ekki býr við fullt fjölmiðlafrelsi og var í 73 sæti af 195 á alþjóðavísu, á milli Benin og Tonga. Fjölmiðlaveldi Berlusconis ræður nokkrum sjónvarpsstöðvum, dagblöðum og útvarpsstöðvum landsins.

Marco Travaglio, rannsóknarblaðamaðurinn sem hefur haldið utan um umfjöllunina um D'Addario tókst eftir langa mæðu að sannfæra yfirmenn á ríkisstöðinni Rai Due að sýna þáttinn. Í honum sagði hann 5,6 milljónum áhorfenda að sannleikanum væri haldið frá þeim en stærstur hluti Ítala fær fréttir úr sjónvarpi. Patrizia D'Addario ítrekaði í viðtalinu fyrri sögu um að henni hefði verið boðið sæti á Evrópuþinginu eftir að hafa sængað hjá Berlusconi á einkaheimili hans í Róm. Hún sagði að sér hefði verið borgað ásamt fleiri dömum til að vera í veislum forsætisráðherrans. 

Opinberanir um einkalíf forsætisráðherrans byrjuðu fyrir sex mánuðum eftir að hann lenti í vandræðum með að útskýra samband sitt við 18 ára gamla fyrirsætu. Berlusconi segir ásakanirnar hluta af samsæri um að grafa undan honum og hefur hótað að þagga niður í gagnrýnendum með lögsókn.  

• 3 blogg um fréttina

Bloggað um fréttina

• Gunnar Th. Gunnarsson: Bara horfa, ekki snerta
• Hólmfríður Bjarnadóttir: Vændiskonan segir frá.
• Gísli Gíslason: Berlusconi miðlar og Baugsmiðlar takmarka gagnrýna umfjöllun !