Milljarður býr við hungursneyð

Sameinuðu þjóðirnar segja að um milljarður jarðarbúa þurfi að þola hungursneyð á þessu ári vegna matvælaskorts og alþjóðlegrar efnahagskreppu. Þetta staðfestir dökka spá stofnana á vegum SÞ fyrr á þessu ári.

Matvæla- og landbúnaðarstofnun SÞ (FAO) og Matvælaáætlun SÞ segja að rúmlega 100 milljón fleiri séu vannærðir í ár miðað við síðasta ár. Talan hafi ekki verið hærri í fjóra áratugi.

Framkvæmdastjóri FAO segir fjölgunina vera ólíðandi. Hann bendir á að nú á dögum búi menn yfir þeirri þekkingu og aðferðum, bæði tæknilegum og efnahagslegum, til að sigrast á hungursneyð. Hann segir að það skorti pólitískan vilja til að ganga skrefið til fulls.

Hungursneyðin skýrist aðallega af hærra matvælaverði, sér í lagi í þróunarríkjunum, og vegna minnkandi tekna og atvinnuleysis.

Talan yfir fjölda vannærðra hefur verið að hækka undanfarinn áratug, og er það viðsnúningur frá þeim árangri sem náðist á níunda og tíunda áratug síðustu aldar.

• 1 blogg um fréttina

Bloggað um fréttina

• Haraldur Haraldsson: Milljarður býr við hungursneyð/veiðum meiri Hval og gefum þeim að …