Erlent | mbl | 29.11.2009 | 14:04

Bin Laden slapp naumlega

Mynd af Osama bin Laden frá 1998. AP

Hryðjuverkaleiðtoginn Osama Bin Laden slapp naumlega frá því að vera handtekinn síðla árs 2001. Þetta kemur fram í skýrslu öldungadeildar bandaríska þingsins.

Í skýrslunni, sem sagt er frá á vef BBC, kemur fram að beiðni um liðsauka hafi verið hafnað og það hafi gert Bin Laden kleift að ganga ósærðum inn á svæði í Pakistan sem ættbálkar ráða yfir.

Mislukkaðar tilraunir til að handtaka Bin Laden hefur að mati skýrsluhöfunda stuðlað að ófriði í Afganistan. Skýrslan er birt stuttu áður en Barck Obama forseti tilkynnir um fjölgun hermanna í Afganistan, en von er á formlegri tilkynningu þessa efnis á næstu dögum.

Skýrslan felur í sér harða gagnrýni á stjórn fyrrverandi forseta, George W Bush, og yfirmenn hersins á þeim tíma.

Í skýrslunni segir að á meðan fjölmennu bandarísku herliði var haldið á hliðarlínunni hafi yfirmenn hersins kosið að treysta á herþotur sem vörpuðu sprengjum og óþjálfaða afganska hermenn sem hröktu Bin Laden inn á hellasvæðið við Tora Bora.

"Þann 16. desember 2001, tveimur dögum eftir að hafa undirritað erfðaskrá sína, gekk Bin Landen óskaddaður út úr Tora Bora og hvarf inn í Pakistan á svæði ættbálka sem lýtur engri stjórn" þar sem talið er að hann sé enn þann dag í dag, segir í skýrslunni.

Donald Rumsfeld, varnarmálaráðherra Bush-stjórnarinnar, sagði á þessum tíma að fjölmennt bandarísk herlið á svæðinu gæti komið mönnum í koll. Hann sagði jafnframt að sannanir um hvar Bin Laden væri að finna væru ekki traustar.

Í skýrslunni segir að sú staðreynd að mönnum hafi mistekist að hafa hendur í hári Bin Laden hafi lagt grundvöll undir þann ófrið sem er í Afganistan í dag og ýtt undir átök í Pakistan.

Tekið er fram í skýrslunni að handtaka Bin Landens hefði ekki eytt allri hættu af hryðjuverkum. En ákvarðanir "sem opnuðu dyrnar fyrir hann inn í Pakistan hafi gert honum kleift að styrkja sig sem tákngerving sem kallaði fram stöðugt flæði fjármagns og hvatti öfgaöfl um allan heim til dáða."

Í skýrslunni er hafnað ásökunum Bush-stjórnarinnar um að upplýsingar leyniþjónustunnar um hvar Bin Laden hélt sig hafi verið ónákvæmar. Skýrslur og viðtöl við menn sem tóku þátt í átökum á þessum tíma sýni að bandaríski herinn hafi verið nálægt því að klófesta Bin Laden.