Erlent | AFP | 10.12.2009 | 15:20

Skiptar skoðanir um friðarverðlaunin

Bandarísku forsetahjónin Barack og Michelle Obama við komuna til Óslóar fyrr í dag. SCANPIX NORWAY

Mikil óánægja ríkir í bæði Pakistan og Afganistan vegna ákvörðunar norsku nóbelsverðlaunanefndarinnar þess efnis að beita Barack Obama Bandaríkjaforseta friðarverðlaun Nóbels. Sjálfur hefur Obama viðurkennt að aðrir kunni að verðskulda verðlaunin frekar en hann sjálfur.

„Nóbelsverðlaunin eru fyrir þau sem unnið hafa einhver afrek, en Obama er morðingi,“ segir Jabir Aftab, verkfræðingur sem býr við stöðugan ótta um að sprengjur verði sprengdar í heimaborg hans Peshawar í Pakistan. Hann er ekki einn um þá skoðun sína að alda aukins ofbeldis í Pakistan og Afganistan sé Bandaríkjamönnum að kenna.

Síðan Obama tók við völdum hefur Bandaríkjaher beint skotum sínum í auknu mæli að al-Queda liðum og Talíbönum sem halda til í norðvesturhluta Pakistans. Heimamenn halda því fram að þessar árásir bitni fyrst og fremst á óbreyttum borgunum og brjóti í bága við fullveldi landsins.

Sprengjur hafa grandað meira en 2.680 manns í Pakistan á sl. hálfu öðru ári og 2.000 hermenn hafa látið lífið í bardögum gegn uppreisnarseggjum í norðvesturhluta landsins.

Bandarísk stjórnvöld hafa lagt hart að pakistönskum stjórnvöldum að taka harðar á veru Talíbana í landinu. Ekki eru nema níu dagar síðan Obama tilkynnti að bandarískum hermönnum í Afganistan verði fjölgað um 30 þúsund.

„Eins og staðan er mun fjölgun hermann um 30 þúsund í Afganistan auka ofbeldið 30 þúsund falt,“ segir Mullah, sem býr í borginni Kandahar í suðurhluta Afganistans. Segir hann brýnt að bandarískir hermenn hætti að varpa sprengjum á óbreytta borgara og koma upp vegatálmum.

„Þetta eru ekki friðarverðlaun. Þetta eru stríðsverðlaun. Obama sendir 30 þúsund hermenn til viðbótar til Afganistans til þess að berjast, ekki til þess að fara í nestisferð,“ segir Amanullah kaupmaður í sömu borg og heldur áfram: „Á hann friðarlaunin skilið? Þeir eru að drepa Afgani. Þeir drepa óbreytta borgara. Þeir sprengja hús í tætlur, gera afganska menn og konur að ekklum og ekkjum og börn munaðarlaus.“

Liðsmenn afgönsku leynilögreglunnar líta Obama hins vegar mun jákvæðari augum og finnst hann betri kostur en forveri hans, George W. Bush. Þeir vona að fjölgun í herliði Bandaríkjamanna muni kveða uppreisn Talíbana í kútinn og stuðla að friði í landinu.

Pakistönsk stjórnvöld hafa einnig óskað Obama til hamingju með verðlaunin og lýst því yfir að þau vonist til þess að hægt verði að koma á friði og auknum stöðugleika.