Erlent | AFP | 7.1.2010 | 11:15

Barnahermenn aðlagast samfélaginu

Frá Nepal. DESMOND BOYLAN

Um þrjú þúsund fyrrverandi barnahermenn, sem börðust fyrir Maóista í borgarastríði Nepals 1996 til 2006, eru nú byrjaðir að yfirgefa búðir á vegum Sameinuðu þjóðanna, sem þeir hafa búið í síðustu þrjú árin.

Flestir þeirra eru nú orðnir fullorðnir, en sumir þeirra voru allt niður í þrettán ára gamlir þegar þeir gengu í raðir uppreisnarmanna og hafa aldrei fengið mikla formlega menntun á ævinni.

„Hendur mínar hafa bara verið þjálfaðar til þess að nota byssur," segir hinn 23 ára gamla Bhawana Chaudary, sem var bara 17 ára gömul þegar hún gekk í raðir hersins. ,,Ég hef gert það síðan í fór í stríðið. Það verður erfitt að aðlagast borgaralegu lífi eftir að hafa búið í búðunum."

Meira en 200 manns skiptu í dag yfir í borgaralegan klæðnað, úr því að klæðast bláum einkennisbúningum Frelsishers fólksins (PLA) og héldu svo heim á leið, eftir formlega athöfn við Sindhuli búðirnar í miðju landsins.

Þetta unga fólk er það fyrsta, af um 24 þúsund manns, sem yfirgefur svona SÞ-búðir eftir stríðið, en slíkar búðir eru á nokkrum stöðum í landinu og starfa samkvæmt friðarsamkomulagi frá 2006.

„Eftir miklar tafir erum við loksins tilbúin til þess að útskrifa þessa fyrrverandi bardagamenn Maóista úr SÞ-búðunum. Það er áfangi fyrir friðarferlið í landinu," segir talsmaður friðarráðuneytis Nepals, við fréttamann AFP.

„Við vonum að það muni greiða leiðina fyrir því að endurhæfa og enduraðlaga Maóistana að samfélaginu."