Segir Íslendinga þurfa á ESB að halda

Þórólfur Matthíasson, prófessor í hagfræði, segir lesendum norska blaðsins Aftenposten að efnahagshorfur á Íslandi séu almennt góðar, til langs tíma litið, þegar hann var spurður um efnahagshorfurnar 2020. Hann vonast til að Íslendingar verði þá gengnir í Evrópusambandið og farnir að gleyma Icesave.

Þórólfur lýsti þeirri skoðun sinni, þegar hann var spurður að því hvort atburðir síðasta árs myndu þrýsta Íslandi inn í Evrópusambandið, að Íslendingar myndu ekki leysa grundvallar vandamál gjaldmiðilsins án þess að ganga í Evrópusambandið. Ísland þyrfti meira á ESB að halda en ESB á Íslandi.

Þórólfur svaraði fjölda fyrirspurna lesenda á netinu og eru spurningar og svör birt á netútgáfu Aftenposten.

Margar jákvæðar athugasemdir í garð Íslendinga komu fram í spurningum. Nokkrir stungu upp á nánara samstarfi landanna í gjaldeyrismálum eða að löndin tækju upp ríkjasamband, jafnvel að Ísland yrði gert að fylki í Noregi. Norðmenn gætu þá nýtt auð sinn til að hjálpa Íslendingum út úr vandræðunum vegna Icesave. 

Þórólfur svaraði því til að þessar vangaveltur væru ekki raunhæfar. Íslendingar myndu varla samþykkja slíkt í þjóðaratkvæðagreiðslu.

Spurður um stöðu ríkisstjórnarinnar ef lögin um ríkisábyrgð á Icesave yrði felld í þjóðaratkvæðagreiðslunni sagði Þórólfur að þetta væri mikilvægt mál fyrir stjórnina og erfitt yrði fyrir hana að sitja áfram við þær aðstæður. 

Netspjallið á Aftenposten.no.