Hyggst afþakka matvælaaðstoð

René Preval forseti Haítí hyggst á fundi sínum með Barack Obama Bandaríkjaforseta óska eftir því að hætt verði að senda matvælaaðstoð til landsins í kjölfar jarðskjálftanna þar í landi. Preval mun óttast að matvælaaðstoðin komi til með að skaða efnahag landsins. Frá þessu er greint á vef danska dagblaðsins Politiken.

Forsetarnir tveir munu funda á miðvikudaginn kemur í Hvíta húsinu í kjölfar jarðskjálftanna 12. janúar sl. sem kostaði, að sögn stjórnvalda á Haítí, alls 230 þúsund manns lífið.

Neyðaraðstoð í formi matar og hreins vatns hefur verið lífsnauðsynleg fyrir þær 1,2 milljónir manna sem misstu heimili sín í náttúruhamförunum. Á blaðamannafundi sem Preval hélt áður en hann hélt frá Haítí, lét hann á sér skiljast að neyðaraðstoð myndi til langframa hafa eyðileggjandi áhrif á efnahag Haítí.

„Ef haldið verður áfram að senda neyðaraðstoð erlendis frá mun það hafa neikvæð áhrif á eigin framleiðslu Haítí og viðskiptalífið hér,“ sagði Preval.

Forsetinn biður þess í stað um aðstoð til þess að endurbyggja landið og skapa fleiri störf, en stór hluti landsmanna var atvinnulaus þegar jarðskjálftarnir riðu yfir landið.

• 1 blogg um fréttina

Bloggað um fréttina

• Ólafur Ingi Hrólfsson: GÓÐUR