Enn mannfall í mexíkóska fíkniefnastríðinu

Lítið lát er á ofbeldisöldunni í Mexíkó sem hófst fyrir alvöru þegar stjórnvöld lýstu skipulögðum glæpasamtökum stríði á hendur. Um helgina voru 25 manns myrtir í norðurhluta Chihuahua fylkis, við landamærin að Bandaríkjunum.

Sjö morðanna áttu sér stað í mestu ofbeldisborg Mexíkó, Ciudad Juarez, en aðeins einni viku hafa 62 verið drepnir í borginni og 850 það sem af er ári. Ástandið var ekki skárra á síðasta ári en yfir 2.660 morð voru framin í Juarez. Þessar tölur eru þeim mun ótrúlegri þegar litið er til þess að íbúar borgarinnar eru ekki nema um 1,3 milljónir.

Átján víg til viðbótar voru svo framin liðna nótt í Chihuahua. Þar af féllu fjórir þegar skotið var af sjálfvirkum hríðskotabyssum á öldurhús í bænum Camargo. Við sama bæ fannst yfirgefin bifreið og í farangursgeymslu lík tveggja kvenna.

Síðan stríð stjórnvalda við fíkniefnagengi Mexíkó hófst í byrjun 2007 hafa um 23 þúsund einstaklingar látið lífið í málum tengdum gengjum. Tengist ofbeldið helst yfirráðum glæpasamtaka og flutningi á fíkniefnum til Bandaríkjanna.

• 1 blogg um fréttina

Bloggað um fréttina

• Ásgrímur Hartmannsson: 60-70% af ölum morðum í mexíkó