Teveislumaður sigraði

Rand Paul, íhaldsmaður í svonefndri Teveislu-hreyfingu í Bandaríkjunum, sigraði í forkosningum repúblikana vegna kosninganna til öldungadeildar þingsins í nóvember.

Paul sigraði Trey Grayson, sem naut stuðnings margra forystumanna repúblikana, með 60% atkvæða. Meðal stuðningsmanna Graysons voru Mitch McConnell, leiðtogi repúblikana í öldungadeildinni, og Dick Cheney, fyrrverandi varaforseti Bandaríkjanna.

Þetta er annar sigur Teveislunnar í forkosningum repúblikana vegna þingkosninganna í nóvember. Áður hafði öldungadeildarþingmaður flokksins í Utah, Bob Bennett, beðið ósigur fyrir frambjóðanda sem naut stuðnings Teveislunnar. Með nafni hreyfingarinnar er vísað til þess þegar andstæðingar breskrar skattheimtu hentu nokkrum teförmum í höfnina í Boston árið 1773.

Öldungadeildarþingmaður demókrata í Pennsylvaníu, Arlen Specter, beið ósigur fyrir fulltrúadeildarþingmanninum Joe Sestak í forkosningum demókrata. Specter var repúblikani þegar hann var fyrst kjörinn í öldungadeildina árið 1981 en sagði sig úr flokknum í fyrra. Hann kvaðst hafa gengið til liðs við demókrata vegna þess að repúblikanar hefðu færst of langt til hægri.

Úrslit forkosninganna þykja benda til þess að sitjandi þingmenn í báðum flokkunum eigi nú undir högg að sækja vegna óánægju almennings með ástandið í efnahagsmálum. Fréttaskýrendur segja að margir kjósendur hafi áhyggjur af því að bandarísk stjórnvöld hafi gert of lítið til að stuðla að efnahagsbata og draga úr ríkisútgjöldum.

• 1 blogg um fréttina

Bloggað um fréttina

• Björn Emilsson: The T.E.A. Party