Handtekinn vegna gruns um upplýsingaleka

Greiningarsérfræðingur hjá bandaríska hernum, Bradley Manning, hefur verið handtekinn vegna gruns um upplýsingaleka. Upplýsingarnar sem um ræðir, eru myndband sem sýnir árás þyrlu bandaríska hersins á borgara í Bagdad árið 2007 og önnur gögn.

Yfirvöld handtóku Manning, eftir að fyrrum tölvuþrjótur, Adrian Lamo, sagði til hans. Manning er þessa stundina ennþá í varðhaldi.

Manning hafði að sögn Lamos, stært sig af upplýsingalekanum. Lamo hugnaðist hins vegar ekki þessi framkoma og lét yfirvöld vita. Hann sagði að þjóðaröryggi væri í húfi og því gæti hann ekki þagað yfir þessum upplýsingum. Lamo sagði Manning einnig hafa stært sig af fleiri lekum, m.a. af annarri upptöku sem sýndi loftárás í Afganistan.

Vefsíðan WikiLeaks, sem fyrst miðla birti myndbandið af loftárásinni í Bagdad, hefur ekki staðfest að Manning hafi veitt upplýsingarnar.

Á myndbandinu fræga má sjá loftárás bandaríska hersins á borgara í Bagdad. Um tólf manns létu lífið í árásinni. Myndbandið var afar umdeilt þegar það var sýnt. Bandaríska varnarmálaráðuneytið hefur ekki dregið trúverðugleika myndbandsins í efa. Það hefur hins vegar reynt að rekja það hver lak upplýsingunum. Nú kann að vera, að þeirri leit sé lokið.

• 1 blogg um fréttina

Bloggað um fréttina

• Torfi Kristján Stefánsson: Tölvuþrjóti hugnaðist ekki!!!