Gríðarleg öryggisgæsla í Svíþjóð

Lögreglan í Stokkhólmi í Svíþjóð hefur haft í nógu að snúast undanfarna daga við að skipuleggja umfangsmestu lögregluaðgerð sem hún hefur ráðist í. Um 2.000 lögreglumenn verða á vakt á morgun þegar Viktoría krónprinsessa Svía mun ganga að eiga Daníel Westling.

„Þetta er umfangsmesta lögregluaðgerð sem við höfum nokkru sinni ráðist í í Stokkhólmi,“ segir Ulf Göransson, talsmaður lögreglunnar við blaðamenn.

Hann segir að um 2.000 lögreglumenn muni ganga um götur höfuðborgarinnar á morgun. Þá munu 6.000 hermenn einnig vera á vaktinni, en sænska ríkisútvarpið segir að sænski herinn hafi aldrei tekið að sér jafn viðamikið verkefni.

„Þetta er mjög stórt verkefni fyrir okkur. Við höfum aldrei gert nokkuð í líkingu við þetta en umfangið er sérstaklega mikið að þessu sinni,“ segir herforinginn Richard Beck-Friis Haell í samtali við útvarpið. 

Að lokinni giftingarathöfn munu 18 Gripen herþotur fljúga yfir Stokkhólm í 400 metra hæð.

Talsmaður lögreglunnar segir að sænska lögreglan hafi heimsótt kollega sína í Danmörku og Noregi og leitað ráða varðandi skipulag öryggismála fyrir konungleg brúðkaup.

Búist er við miklu fjölmenni í höfuðborginni á morgun, þar á meðal fjölskyldufólki með börn. Lögreglan er t.d. búin að setja upp hvorki fleiri né færri en átta miðstöðvar í borginni fyrir börn sem hafa týnt foreldrum sínum.