Þjóðverjar dæma líknardráp löglegt

Hæstiréttur Þýskalands felldi tímamótadóm í dag þegar snúið var við sakfellingu yfir lögmanni  sem ráðlagði fjölskyldu aldraðrar konu í dái að taka hana úr sambandi. Málið, sem hefur vakið mikla athygli í Þýskalandi, snýst um andlát hinnar 71 árs gömlu Eriku Kuellmer sem féll í dauðadá eftir heilablóðfall í október 2002 og var haldið á lífi í 5 ár á hjúkrunarheimili.

Kuellmer hafði sjálf lýst því yfir að hún vildi ekki láta halda sér lifandi ef slíkar aðstæður kæmu upp, en starfsmenn hjúkrunarheimilisins neituðu að leyfa henni að deyja. Fjölskylda hennar ákvað hins vegar að klippa á slönguna sem nærði hana með skærum að áeggjan lögfræðings þeirra, og tveimur dögum síðar lést Kuellmer af "náttúrulegum orsökum" samkvæmt krufningu.

Á neðra dómsstigi var dóttir Kuellmer sýknuð af því að myrða móður sína á þeim grundvelli að hún hefði „fyrir mistök" fylgt ráðum lögfræðingsins. Lögfræðingurinn, Wolfgang Putz, var hins vegar sakfelldur og dæmdur í 9 mánaða skilorðsbundið fangelsi.

Hæstiréttur komst hins vegar að þeirri niðurstöðu að Putz, sem hefur barist hatrammlega fyrir réttindum sjúklinga, hafi ekki brotið lög og jafnframt haft hagsmuni sjúklingsins í huga þar sem hún hafi sjálf ekki viljað lifa í dauðadái og gefið það skýrt til kynna áður. Ljóst hafi verið að hún myndi aldrei vakna úr dáinu.

Forseti hæstaréttar í Þýskalandi sagði þegar hún samþykkti að taka málið fyrir að markmiðið væri að skýra skilin á milli „dráps" og „náttúrulegs dauða".

• 2 blogg um fréttina

Bloggað um fréttina

• Aðalsteinn Baldursson: Þetta er ekki líknardráp.
• Klukk: Enginn glæpur framinn.