8.819 blaðsíðna tilboð

Evrópski flugrisinn Airbus kynnti í dag tilboð fyrir Bandaríkjaher um smíði flugvéla sem geta fyllt aðrar vélar af bensíni á flugi. Bandaríkjaher hefur lýst yfir áhuga á að gera samning um smíði 179 slíkra flugvéla. Tilboðið var skriflegt og hljóðaði upp á nákvæmlega 8.819 blaðsíður.

Keppinautur Airbus, Boeing, rennir einnig hýru auga til samningsins sem talinn er vera virði 40 milljarða bandaríkjadollara og kallaður er „samningur aldarinnar“.

Airbus kynnti í tilboði sínu her-útgáfu af A330 farþegaþotunni, sem nefnist KC-45.

Frestur til að skila inn tilboði rennur út á morgun, föstudag, og búist er við að Boeing skili þá inn sínu tilboði.

Í tilkynningu frá EADS, móðurfélagi Airbus, sagði að ef fyrirtækið hlyti samninginn myndi ný verksmiðja þeirra rísa í Alabama og skapa um 48.000 störf.

Talið er að herinn taki ákvörðun um við hvern hann ætlar að semja fyrir 12. nóvember næstkomandi.

• 1 blogg um fréttina

Bloggað um fréttina

• Arnór Baldvinsson: Endurtekið efni...