Obama leitar aðstoðar Clintons

Barack Obama, Bandaríkjaforseti, hefur ákveðið að leita liðsinnis Bills Clintons, fyrrverandi forseta, við að koma hjólum efnahagslífsins af stað að nýju. 

Clinton sat lokaðan fund, sem Obama hélt með forustumönnum í bandaríska viðskiptalífinu um leiðir til að fjölga störfum og auka fjárfestingu, meðal annars í grænni orku.  

Bandaríska viðskiptaráðið gagnrýndi í dag harðlega efnahagsstefnu Obama og sakaði hann og meirihluta demókrata í Bandaríkjaþingi, að hindra vöxt með flóknu regluverki og skattareglum og vanrækja að ýta undir fjölgun starfa. 

Að sögn Reutersfréttastofunnar hefur Obama í auknum mæli leitað til Clintons, sem naut í forsetatíð sinni stuðnings bandaríska viðskiptalífsins enda var mikill uppgangur í Bandaríkjunum í forsetatíð hans. Clinton hefur meðal annars aðstoðar þingmenn demókrata við að undirbúa kosningabaráttuna fyrir þingkosningar í nóvember. 

Þá útnefndi Obama í dag Jack Lew, fyrrum embættismann í stjórn Clintons, í embætti yfirmanns fjárlagagerðar í Hvíta húsinu.  

Fyrr í dag átti Obama fund með kaupsýslumanninum Warren Buffett í Hvíta húsinu þar sem rætt var um efnahagsmál. Obama þurfti að lána Buffett bindi fyrir myndatöku vegna þess að bindi Buffets hafði trosnað. 

• 1 blogg um fréttina

Bloggað um fréttina

• Haraldur Haraldsson: Obama leitar aðstoðar Clintons/ þetta var viti meir ,að gera …